وەستانی جەنگ، وشکردنی سەرچاوەکانی تیرۆرو تیرۆریزمە!

وەڵامێک بە ” فاتح شیخ”

سامان کەریم

Saman.karim5@gmail.com

“فاتح شیخ” لە چاوپێکەوتنێکدا لەگەڵ هەفتەنامەی”کمونیست/٣۵٩”دا، سەبارەت بە جەنگی موسڵ، باسی لە سیاسەتی “ریزەکانی” لە حزبی کۆمۆنیستی کرێکاری عێراق کردوە. بە کار‌هێنانی ” ڕیزەکانی حزب” لە لایەن فاتحەوە، بەکارهێنانیکی گونجاو نیە و دورە لە پرۆسەی ڕەخنەگرانەی مارکسستیەوە، دیاردەکان وە ڕوداوەکان وە ناوەکان وەک خۆی پێویستە ئاماژەی پێ بکرێت.  باسی حزب باسی بەیانێکە کە بلاوبۆتەوە هەر نوسین و باس و وتارێکی دیکە باسی حزب نیە. لەمبارەوە حزب یەک بەیانی دەرکردوەو بەڕۆشنی دژی جەنگ وەستاوە، ئیتر ” لە نێو ریزەکانی” هیچ مانایەکی نیە.

سەرەتا بلێم ‘فاتح شیخ” بە ڕەخنەگرتنی لە دروشمی ” وەستانی جەنگ”، دەریچەیەکی گونجاوی کردەوە بۆ زیاتر تێگەیشتن لە مەسەلەی جەنگی ئەمرۆ ” نەک هەموو جەنگیک بە گشتی” لەمبارەوە کارێکی باشی کردوەو من پێشوازی لیدەکەم. من پێم وایە ڕۆشنکردنەوەی زیاتری ئەم سیاسەتە ” وەستانی جەنگ” کۆمەلیک مەسائیلی گرێی ئەم قۆناغە مێژوییەمان بۆ واڵا دەکاتەوە. باسی من لیرەدا هەموو چاوپێکەوتنەکەی فاتح شیخ نیە. بۆ نمونە ئەو باسی لە ئامانجەکانی هەر یەک لە بەشداربوانی شەڕی موسڵ کردوە،لەسەر بەند بەبەندی ئەوانە دەکرێت قسە بکرێت و لەمبارەوە  جیاوازی لێکدانەوە و تەفسیری جیاواز کۆسپێک پێک ناهێنیت،  بەهەرحال باسی من نیە لێرەدا. یان باسی ئەوەی کە ئەو هەموو هێزە بە بەرنامەی جیاوازو دژ بەیەکەوە بەشدارن دژی داعش، کە ئەوە ڕاستیەکە بەلام بەبێ باسکردنی هۆکانی ئەم دیاردەیە و هەلومەرجیک کە  هەجینێکی ئاوا دەخولقێنی، سەر گێژی دروست دەکات وەک ئەوەی کە ڕۆشناییەک بدا بە خوێنەران، بەتایبەت باسی واقعیەتێکە کە هەموو کەس دەیزانێ. ئەوەی کە هەموو کەس درکی پێ ناکات کۆبونەوەی ئەو هەموو دژەیە لە شەڕی موسڵ یان حەلەبدا، لێرەدا بە پیویستی نازانم ئەم باسە بکەمەوە. خوێنەران دەتوانن سەرنج بدەنە نوسراوی “ئەم جەنگە پێویستە بوەستێت! ئاوابونی خوێناوی “سیستەمی نوێی جیهانی”ئەمریکا!”

هاوڕی فاتح شیخ دەنوسێت:” دژایەتیکردنی “بە تیۆریکردن” جەنگی موسڵ لە ڕیزەکانی حزبی کۆمۆنیستی کرێکاری عیراق، زۆر نا بەرپرسانەیە وجێگای داخە. “بێ موبالاتی ئاشکراو بێ پاساوە بە ژیانی نێو جەهەنەمی خەڵکی موسل” لە ژێر دەسەلاتی وەحشیانەی داعشدا، نمونەیەکی  بەرچاوی تاکتیکێکی ” عافیەت تەڵەبانە” و پاسیف و ‌هێزگەڵیکی حاشیەیی کۆمەڵگایە“. ( تەئکیدەکان هی منە). باسی من لێرەوە ئەوەندە پەیوەندی هەیە بە حزبەوە کە دروشمی ” وەستانی جەنگی” هەڵگرتوە. کەواتە باسەکە باسی تاکتیکە جیاوازەکان، باسی تاکتیکی چینە جیاوازەکانە، باسی ڕوانگە چینایەتیە جیاوازەکان و مێسۆدە جیاوازەکانە، باسی قۆناغیکە لە مێژوو، باسی ڕوداوو جەنگێکە کە مۆر لە ئایندەی ئێمەو نەوەکانی داهاتوشمان دەدات، باسە لە ملیارەها ئینسان نەک تەنها موسڵ وئەلیبۆ. بۆیە باسەکە لە حزب گەورەترە، وە جەنگەکە لە موسڵ و عێراق گەورەترە، وە هەموو کەس لایەنی کەم پەیوەندی ئەلیبۆو موسڵ دەزانیت و “فاتیح”ش بە دروست ئاماژەی بەم پەیوەندییە کردوە، بەلام پەیوەندی موسڵ و ئەلیبۆو تەواوی جەنگەکە بە ژیان و ئەمنیەتی خەڵکی ئەوروپاو ئەمریکاو ئێران و تورکیاو وولاتانی دیکەوە، لەم مێسۆدەدا دیار نیە، بەڵام لە سەری ‘ بێ موبالاتی” یەوە نیە، وە لە پاسیفیزمی سیاسیشەوە نیە، ئەگەر چی دەگات بەوە، لە تێڕوانین و دیدگاو بۆچونی جیاوازی چینایەتیەوەیە، لای من باسەکە بە تەئوسف چارەسەر نابێت ئەگەر نا هەزار جار تەئوسفم دەنوسی.

جەنگ لە نێوان ئەتۆمیزەکردنی لۆکەل و وێلکردنی ئەنتەرناسیونالدا!

 باسی من جەنگە، جەنگێک کە لەئارادایە، بەبێ تێگەیشتن لە جەنگەکە ناتوانین سیاسەتێکی دروست لە سەر شەڕی موسڵ بدەینە دەستەوە. وتاری پێشووی من باسی جەنگە لە سوریا وە بەدیاریکراوی لە ” ئەلیبۆ”، ئەو وتارەی کە لەسەرەوە ئاماژەم پێکردوە. بە سادەیی ئەگەر تەنها باسی شەری موسڵ بکەین یان بڵێین جەنگی موسڵ جیابکەینەوە، ئەوکات بەرانبەر بەم هەموو جەنگە جیاوازانە چی بلێین: جەنگی ئەلیبۆ لە سوریا، جەنگی رەقە لە سوریا، جەنگی دەرعا لە سوریا… ، جەنگی میسراتە لە لیبیا، جەنگی بەنگازی لە لیبیا، جەنگی سەنعا لە یەمەن، جەنگی تەعز لە یەمەن…. ئەگەر هەموو ئەوانە جەنگی جیاوازن و هەریەکەیان ئامانجێکی جیاوازی هەیەو هێزە بەشداربوەکان جیاوازن؟ سیاسەتمان چیە لە بەرانبەریاندا؟! یان بزوتنەوەی ئێمە کۆمۆنیزمیکی لۆکەڵی خولقاندوە!! جەنگە گەورەکە نابینێت.  ناتوانیت ئەم دارستانە گەورەیە ، ئەم جەنگە فراوان و گەورەیە نەبینیت” من ناوم ناوە جەنگی سێهەمئ جیهانی” کە لە ئێستادا بە وەکالەت پیادە دەکرێت، بەڵام یەک دار ببینیت ئەویش موسڵە. بەرانبەر بەم ڕوداوە گەورەیە کە جەنگە وە ناوچەییە وە دەتوانین بڵێین هەموو دونیا بە ڕاستەوخۆ یان ناراستەوخۆ بەشدارە تیایدا سیاسەتی مارکسستی چی یە؟! لە کام ڕوانگەوە پیویستە سەرنج بدرێت؟ بەرژەوەندییەکانی چینی کرێکار لەکام سیاسەتدا فۆرمۆلە دەبێت؟! ئەو لێکدانەوەیەی کە پێی وایە” نابیت موخالەفەتی ئەمریکاو هاوپەیمانەکانی بکرێت دژ بە داعش” یان “.نابێت دەستی لایەنی تر بگرن” یان ” شەری دژی داعش مەحکوم ناکەین” یان وە یانی  تریش…  لە باری تیوریەوە هەڵە وە لە باری سیاسیەوە زیان بەخش. دواتر لە خوارەوە ڕۆشن دەبێتەوە.

موسڵ مەیدانێکی گەورەی شەڕو بەرەیەکی فراوانی جەنگێکی گەورەترە. بە قسە وە نوسین وا دەردەکەویت کە ئەوەی ناوی کۆمۆنیزمی کڕیکارییەو خۆی بە خاوەنی مەنسوری حیکمەت دەزانیت هەمووی هاوڕابیت لەسەر ئەوەی کە ئەم جەنگە بۆ لەناوبردنی داعش نیەو بۆ یەکلایکردنەوەی دوبارە دابەشکردنەوەی دونیایە لەسەر پایەیەکی تازە، سیستەمێکی جیهانی نوێ، بۆ یەکلاکردنەوەی دەسەڵآتە لە دونیادا. جەنگێکە کە ئەمریکا زۆر رۆشن ڕابەری تاقانەیی دونیای لە دەست داوە پەلەقاژەی مانەوەی دەکات، دژەکانی لە روسیاو چین  داوای جیهانێکی چەند قوتبی دەکەن. لەسەر ئەم باسە لە نێو ئەم بزوتنەوەیەی کە ناوی ” کۆمۆنیزمی کریکاریە” وا دەردەکەوێت کۆسپێک نەبیت دیارە بە شیوازئ نوسین و دەربڕینی جیاوازەوە بەلام  بەهە مان ناوەرۆکەوە. بە جیالەوەش هەموو پەیوەندی نێوان موسڵ وئەلیبۆ یان موسل و یەمەن درک دەکەن ئەگەر وایە چۆن دەکرێت ئەم هەموو جەنگە یان ئەم هەموو شەرە جیا بکەینەوەو بۆ هەمووشیان هەر هەمان لیکدانەوە دوبارەبکەینەوە؟!.  ئەگەر جەنگێک هەیەو لە پێناو مەسەلەیەکی گەورەی جیهانیدا هەیە، کە هەمووی بە ڕواڵەت هاوڕایە کەواتە بە جیا لە موسڵ وە پێش موسڵ واتە پیش مانگی ئۆکتۆبەر سیاسەتی مارکسستی چی یە؟! دژایەتی ئەم بوچونەی فاتح” لە تاکتیکی سیاسیدا” کە پێم وایە فاتیح بێ تەکتیکەو هیچی پێشنیار نەکردوە، پاسفزمێکی عوریانە، لەوەدا دەردەکەوێت کە جەنگ نابینێت و موسڵ دەبینێت. ئەم بۆچونە وە هاوشیوەی ئەم بوچونە کە بەبڕوای من بە جیاوازییەکی کەمەوە لە فۆرمدا بۆچونی باو وە زاڵی نێو بزوتنەوەکەمانە، کە پێم وایە چەند ڕەوت و بزوتنەوەیەکی جیاوازە لە نێو بزوتنەوەیەک و تەنانەت لە نیو یەک حزبدا.

لە چوارچیوەی ئەم بۆچونەدا، مارکس وە مارکسیزم هیچ مەودایەکی ئەنتەرناسیونالستی نیە، نەک لەباری پراتیکەوە کە لەبناغەوە سیاسەت پراتیکە، بەڵکو لە باری تێروانینیشەوە. بەپێی ئەو بۆچونە واتە بینینی موسڵ و جیاکردنەوەی لە دنیا. نەبینینی کەریگەرییەکانی بەسەر ژیان و ئەمنیەتی خەلکی ئەورپاو ئەمریکا، وە لە بەرەکانی دیکەی جەنگ. ئەوکات باسەکە لەو چوارچیوەیەدا بەم شیوەیەی لێ دێت: شەری ڕەقە، پیویست ناکات کۆمۆنیستەکانو ئازادیخوازان دژایەتی ئەمریکاو هاوپەیمانەکان بن،  چونکە داعشی لێ یە!! شەری ئەلیبو، پێویست ناکات کۆمۆنیستەکان و ئازادیخوازان دژایەتی روسیاو سوریاو ئیران بکەن، چونکە داعشی لێ یە( بۆ ئەمەیان ئێرانی تیایە لەوانەیە فاتیح رەئی جیاوازی هەبێت، لە خوارەوە باسەکەی هەیە). شەری میسراتە پێویست ناکات کۆمۆنیستەکان و ئازادیخوازان دژایەتی ئیتالیا و ئەمریکاو فەرەنساو بەریتانیا بن، چونکە داعش ژیانی خەلکێ ئەو ناوچەیەی کردوە بە جەهەنەم!! شەری تەعز لە یەمەن پیویست ناکات کۆمۆنیستەکان دژایەتی ئیران و سعودیەو ئەمریکاو روسیا بن( لیرە داعش زۆر لاوازەوە شەرەکە ڕاستەوخۆ بە وەکالەت لە نیوان ئیران و سعودیەدایە)…. ئاو بێنەو دەست بشۆ. کۆمۆنیستەکان دانیشتون  و وتار دەنوسن و چاوپیکەوتن دەکەن و فرۆکەکان و سوپای ئەمریکاو روسیا و بەلجیکاو دانمارکو فەرەنساو بەریتانیاو عیراق و سوریا وسعودیە و نیوزلاند کاولکاری و کۆمەلکوژی خۆیان دەکەن. لە ئاستی جیهان و رەئی گشتی خەڵکی جیهاندا ” داعش” کراوە بە ” بۆکیمۆن” ێکی ترو هەموو خەلکی دونیان پێوە خەریککردوەو سەرنجی خەڵکیان لەسەر مەسائیلە سەرەکیەکانی ژیان و گوزەرانیان لابردوە، لەوە زیاتر لە ژێر ناوی پاراستنی ” ئەمنەیەت” دا لە نێو جەرگەی ئەوروپاو ئەمریکا دا هەموو ڕۆژێک مافە سیاسی و مەدەنی و کۆمەلایەتیەکانی کریکاران و زۆربەی زۆری دانیشتوانەکەی دەکرێتە قوربانی. ئەمە ئەگەر واز لە گەورەبون و فراونبونەوەی ڕاسیزم و قوڵکردنەوەی زیاتری ئاپارتاید لەسەر بناغەی نەتەوەو دین و تائیفە، بهێنین. ئەمرؤ ئەم جەنگە بۆ چینی بورژوایی گەورەی دونیا بەرژەوەندییەکانی ڵە ڕادەبەدەرە، لە کاتیکدا کە دەرگیری قوڵترین ئەزمەی ئابوری و سیاسی و فکری سیستەمەکەیەتی.  ئەم ڕوانگەو مێسۆدە هەموو ئەم مەسائیلانەی بۆ گرینگ نیە، وە نایبینێت یان ئەگەر بیبینێت، ئەوە مەنفەعەتی بزوتنەوەکەی لە لۆکەڵدا، بەرچاوی گرتوەو ڕیگا نادات کە زیاتر سەر بەرزبکاتەوە.

لە چوارچیوەی ئەم بۆچون و مێسۆدەدا، دەلێن کە دەبیت کریکارو خەلک مقاوەی چەکدرای بکات دژی تیرۆر، دەبێت خەڵکی موسڵ خۆی رێکخراو بکات، دەبێت و دەبێت بەڵام کەی دەیڵین و دەینوسن؟! ئەوکاتەی کە ئەمریکاو تیرۆریزمی دەوڵەتیەکەی لە لێواری سەرکەوتندایە و شەڕەکە دەستی پێکردوەو تاڕادەیەک بڕاوەتەوە وە لەڕووی سەربازییەوە واقعەن جەنگەکە بڕاوەتەوەو ئەمە ڕەئی زۆرێک لە لێکؤلێنەرەوە سەربازییەکانە. کاتێک دەلێن کە ئیتر کار لە کار ترازاوە. بە تایبەت کە کاری رێکخراوکردنی خەلک و کرێکاریش لە هەلومەرجی ئەمرۆی دونیاو لەسایەی فەزای دواکەوتوو کۆنەپەرستانەی  فکری و سیاسی و ڕۆشنبیری  دونیاو ناوچەی رۆژهەڵاتی ناوەراست و باکوری ئەفەریقا هێجگار  کاڕیکی سەختەو پیویستی بە کاتە. ئەمە ئەگەر نەبونی میدیا بۆ ئەم کۆمۆنیزمەی ئێمە لە بەرچاو بگرین کە ڕۆڵی میدیا هێجگار چارەنوسسازە، ئەوکات کارەکەمان هێجگار سەختر دەبێت. بۆیە لەو چوارچیوەو مێسۆدی بیرکردنەوەیەدا، ڕؤشنە کە هیچ ناکریت وە بە تایبەت لەو فەزای چەخماسازیەی جەنگدا.  ئەگەر پێشتر هێزێکی چەکەداری ئامادە یان بە نفوز نەبوو بیت. لەو چوارچیوەیەدا واقعەن لە باری عەمەلیەوە هیچ ناکریت و شەری موسڵ زۆر زووتر لەوە تەواو دەبێت کە فریای ئەوکارانە بکەویت. ئەو لێکدانەوەیەو بەو مێسۆدەوە کە پەیوەندی نەک بە ئامادەیی کریکارەوە نیە بە لکو بە ئامادیی خەڵک و هیچ بزوتنەوەیەکی ڕادیکالەوە نیە، وە لەوەش ئەو لاتر پەیوەندی بەهێج بزوتنەوەیەکی مقاوەمەتی گشتی دژی تیرۆرەوە نیە، تەنانەت لە وەی کە لە کەرکوکیش ڕوی دا لە هەفتەی پێشودا کە ئاسۆی سیاسی جوڵانەوەکە هێجگار شۆڤێنی بوو، بەلام بە هەر حال مقاوەمەتێک بوو لەبەرانبەر داعشدا.  بەڵام نەریتی بزوتنەوەکەی ئیمە وایە کە دواتر پاش ماوەیەک پاش چەند مانگێکی دیکە کە موسل تەواو دەبیت ناپرسیتەوە کە چیکردوە؟! ئایا سیاسەتەکەی دروست بوە یان نا؟ کۆسپەکانی چی بوە، بۆ نەیتوانیوە جێبەجێێ بکات؟! ئەوانەی بۆ مەسەلە نیە مێژووی بزوتنەوەکەمان دوبارەکردنەوەی ئەم فەرهەنگەیە. پاش ۶ مانگی دیکە ئەگەر موسڵ داعشی تیدا نەما،  لە ” فاتیح” دەپرسین ئەم سیاسەتەت چی لێهات؟! ئەوە موسڵ داعشی تیدا نەما بەڵام جەهەنەمێکی تر جا لە موسڵ بیت یان لە شارێکی دیکە بۆ خەڵک خوڵقاوە، ئەوکات فاتیح هەمان باسمان بۆ دوبارە دەکاتەوە، دەبێت لەم هەلەقەیەدا هەر بسورێینەوە.

جیاکردنەوەی جەنگ لە دەرکەوتەکانی، جیاکردنەوەی شەر لە توندوتیژیەکانی، لە کوشتنو کاوڵکاری وەهمە، گەوچکردنی خەلکە، چەپڵە لیدانێکی موئەدەبانەیە بۆ ئەمریکاو هاوپەیمانەکانی. هاوسوی سیاسی یە لە چرکە ساتێک لە چرکەساتە گرینگەکانی  قۆناغێکی گرینگ و هەستیاری مێژوویدا. لە گەل پارتی دیموکرات و هەموو ئەوانەی هاوپەیمانی ئەمریکان لە موسل.  هەموو دەڵێن جەنگە بۆ یەکلایکردنەوەی مەسائیلی گەورەترە، کەواتە بۆ نەهێشتنی داعش نیە لە بناغەوە ئەگەرچی ئەوە دەبێت ئەنجامی بێت، وە هەموو ئەوەش دەلێنەوە. بەڵام ئەوە رۆشنە کە بە شەری موسل ئەو مەسائیلانە جیهانیانە یەکلانابێتەوە بەتایبەت کە لە پێشەوە بەرەی براوەی شەری موسڵ دیارە کە ئەمریکاو هاوپەیمانەکانیەتی، بەجیا لەوەی لە کام یەک لە هاوپەیمانەکانی کەمتر یان زیاتر سودی لێ دەبینێت.

کێشەکە بۆ ئەمریکاو هاوپەیمانانی داعش نیە، بەڵکو روسیاو چینو  ئێرانە، بە موسڵ ئەمە یەکلاینابێتەوە، چونکە زۆر سادە ‌هیزی بەرانبەر لێرە رۆشن دیار نیە ئەگەر چی هەیە بە هۆی حەشدی شەعبی و ملیشیاکانی دیکەی سەر بە هێزە بورژاوییەکانی شیعە و بەشیک لە حکومەتی مەرکەزی عیراق. بەڵام بۆ ئەوەی دوژمنەکەت بدەیت لە زەوی پیویستە لە مەیدانی سەرەکی بە شیوەیەکی ڕوبەڕوتر، لە ئێستادا ” بەوەکاڵەت” بوەستیتەوە لە بەرانبەریدا. ئەو جیگایە سوریایە لە ئێستادا ئەلیبۆیە لەوانەیە رەقە ئەو سەنتەرە بگڕیتەوە، بەهەرحال سوریا یە چونکە روسیا لەوێیە. لەوی روسیاو هاوپەیمانەکانی بکەون ، ئەو بەرەیە ئەو ” قوتبە” لە رۆژهەلاتی ناوەراست شکست دەخوات و بارگەو بنەی لە تەرتوس پێ خاڵی دەکەن. بەڵام لە موسڵ وانیە لە موسڵ ئەنجامەکەی دیارە کە لایەنی براوە داعش نیە بەڵکو ئەمریکاو هاوپەیمانەکانیەتی. ئەوە ڕۆشنە کە ئیران دەیەوێت بەشی هەبیت، لەم ڕێگەیەوە روسیا دەیەویت بەشی هەبیت. پێویست بە ڕۆشن کردنەوە ناکات کە ئەمریکا موسڵ بەرێتەوە کاریگەری دەبێت لەسەر گشت جەنگی ناوچەکە و بالانسی ‌هێز دەشکێتەوە بەلایدا وە پیچەوانەشەوە ڕاستە. بەڵآم لە قۆناغی ڕاگوزەردا ئالوگۆرەکان نەک رۆژانە بەڵکو لەهەر کاتژمێرکدا ڕودەدەن.

جیاکردنەوەی موسڵ و نەبینی جەنگەکە، دارستانەکە، میسۆدێکە لە ژیر ناوی ‘ ئینسای بون و رزگارکردنی خەلکی موسل لە جەهەنەم” . عێراق و داعش و موسڵو فریشتەکانی نەجات ” ئەمریکاو هاوپەیمانانی” دەبینێت بەڵام لە دەرەوەی ئەم سنورە چی دەبیت باسێک نیە، خەڵکی موسڵ دەبیت رزگاری بێت” وە حەتمەن دەبێت رزگاری بێت” بەلام خەلکی رەقەو ئەلیبۆو میسراتەو بەنگازی و سبەینی نواکشۆت و ئەلجەزائیر و ئاسیای ناوەراست قەیدیناکات، فەزای ترس و نائەمنیەت لە ئەوروپا دونیادا، یان نایبینێت یان لێکدانەوەو میسۆدەکە وانیە. یەک جەنگە وە لە پێناو یەک مەسەلە لە ئاستی جیهانیدا پیادەکرێت لە هەلومەرجێکی دیاریکراوی مێژووی دا کە قۆناغێکی ڕاگوزەرە لە نێوان سیستەمی جیهانی کۆنی بەسەرچوو کە لە ئاوابوندایە، وە سیستەمی جیهانی چەند قوتبی کە هەڵاتوەوە جێنەکەوتوە. تێ نەگەیشتن لەم قۆناغە، لە یاسای بزوتنەوەی میژوو لەم قۆناغەدا، دەمانباتە ئاستی ئەتۆمیزەکردنی ڕوداوەکان لە یەکتری لە کاتێکدا کە کارەکتەرو بکەرە سەرەکیەکانی لە پەنجەکانی دەست تێپەڕ ناکەن، لە هەموو جیهاندا. جیهانێک کە لە قەیرانیکی سەرمایەداری هەمەلایەنەو قوڵدا دەژی، جیهانێک کە بەتەواوی گلۆبالە، تەنانەت دەرکردنی یاسای ” جاستا”لە لایەن کۆنگرێسی ئەمریکاوە، مەسەلەی گلۆبالی بردە ئاستی یاساکانی سزادانی دەوڵەتەوە لەلایەن دەوڵەتێکی ترەوە، بەجیا لەوەئ ئەمە چەند سەر دەگرێت یان نا؟! کە زیاتر لە شەرفرۆشتنی سیاسی دەچێت!. سیاسەت بەتەواوی گلۆبالە، وە وانەبێت ناکرێت وە جیهان بەریوە نابریت، لەمبارەوە بورژوازی ئەنتەرناشیونالترە لە ئیستادا.  ئەم جەنگەش بەهەمان شیوەیە و ناتوانین بە جیا و بۆ هەر بەرەیەک سیاسەتێک دارێژیت. سیاسەت بەرانبەر ئەو مەسەلەیە دادەرێژریت کە قۆناغە مێژوویەکە دیاری کردوە نەک هێچ مەسەلەیەکی دیکە و لە ژیر هەر ناوێکی دیکە.ئەم مەسەلەیە ئارەزومەندانە نیە، وە لۆکەڵی نیە. قۆناغی مێژووی ئەمرۆی دونیا چی خستۆتە بەردەم کۆمەلگای بەشەری؟! وەڵامەکەی لەسەرەوە باسکراوە.” جەنگە لە پێناو دوبارە دابەشکردنەوەی ناوچەکانی نفوزو دەسەڵات لە ئاستی دونیادا”. پێوێستە وەلام بەو مەسەلەیە بدەیتەوە پاشان  ولەو چوارچیوەیەدا وەڵام بە شەر یا جەنگی موسل بدرێتەوە. داعش لەم دارستانە گەورەیەدا بوکەلەیەکی حەقیری سەرمایەیە.

ئەمریکا وەک بە کرێگیراوێک!

 فاتیح شیخ دەنوسێت:” سەر ئەنجام دروستکەران و بەهێز‌کەرانی داعش دوای دووساڵ و چوار مانگ لەدەسەلاتی  وەحشیگەریانەی ئیسلامی بەسەر ژیانی خەلکی موسلدا، بۆ دەرپەڕاندنی هاتونەتە مدەیدانی جەنگەوە، مەوزوعیەتی نیە کە کە خەلکی موسل و کۆمۆنیست و ئازادیخوازەکان بیانەوێت دژایەتی بکەن“. (تەئکیدەکان هی منە). لەگەڵ جۆریک کۆمۆنیزم بە رەو ڕووین کە لەگەڵ مقاوەمەی کۆبانی د ا جیاوازییەکانی هێجگار کەم دەبیتەوە لە گەڵ پەکەکە ولەگەل شەری موسلدا جیاوازییەکی وای نامینیت لە پال ئەمریکاو روسیادا بجەنگێت. وە پێم وایە تۆزێک ختوکەی بدەی دەجەنگی لە خوارەوە زیاتر ڕۆشن دەبێتەوە. ئەوکات ئێمە ختوکەی ناسیونالیزم و ئەمرۆ هەموو کۆمۆنیزم بچوکراوەتەوە تا ئاستی دژایەتی ئیسلامی سیاسی و تیرۆریزم،  نەبینینی سەرمایەو گەورە سەرمایەداری دونیا، خەریکە دەبێتە خاڵی جیاکەرەوەی ئەم کۆمۆنیزمەی ئێمە لە ڕوداوو ئاستەنگە سیاسیەکاندا. سەیر ئەوەیە لە ئەمریکا بگەرێت و بلێیت ” دەستی ناگرین” وە ” مەوزوعیەتی نیە کە دژایەتی بکەین” ” جەنگەکەی دژی داعش ئیدانە ناکەین” لە هەمانکاتدا  ئەوەشت بۆ ڕۆشن بیت  کە ئەمریکا خۆی داعشی دروستکردوە، وە بەهێزی کردوە. ئەگەر ئەمریکا خۆی داعشی دروست کردوە کە من پێم وایە زەمینەیەکی کۆمەلایەتی و ماددی هەیە و کاری گەورەی بۆ کراوە لە ماوەی چەند دەیەی ڕابوردوودا بە ڕابەری ئەمریکا. بەڵام کە پێت وایە ئەمریکا دروستی کردوە، ئیتر باسی ” مەوزوعیەتی نیە کە خەلکی موسڵ و کۆمۆنیست ….دژایەتی بکەن” هیچ بنەمایەکی نامێنیت، وە مانای نیە. چونکە داعش لە موسڵ نامینیت، بەڵام بەپێی ئەو بوچونە ئەمریکا بەپیی پیویست دروستی دەکاتەوە، ئەوکات دەکەویتە نێو هەلقەیەکی داخراوەوە هەر دەخولێیتەوە. قاعیدە لاواز بوو بەڵآم سەیری دونیابکە، بورژوای گەورەی دونیا چ جڕو جانەوەرێکی تیرۆریستی مۆدێرنی بۆ خەملاندوین و زەمینەی گەشەو بە‌هێز بونی فەراهەمکردوە.

 ئەم ڕوانگەو مێسۆدە بۆ ڵیکدانەوەی ئەم جەنگ و ڕوداوانە، دژایەتیکردنی داعش دەبینێت نەک لەبەر ئەوەی تیرۆریستە، چونکە هەموو دەلێن ئەمریکا گەورەترین تیرۆریزمی دەوڵەتی پیادە دەکات، بەڵکو لە بەرئەوەی ئیسلامی یە، پێ دەچێت کۆمۆنیزمێک کە لە لۆکالێ ئێرانەوە هاتبێت نەتوانیت خۆی لەم ڕوانگەیە لابدات. بەڵام خەتەرە  گەورەکە، تیرۆریزمە گەورەکەی ئەمریکا نابینێت کە لەدوای ئەفغانستانەوە واتە لە ١۶ ساڵ لەمەو بەرەوە، چەند کارەساتی گەورەی بەسەر کۆمەڵگای بەشەری دا سەپاندوە، بە دەستگیرۆیی و بەهێزکردنی خودی داعشیشەوە، لە ژێر ناوی دژی تیرۆریزم و داعشەکاندا.

حەتمەن دەبیت داعش نەمێنێت وە حەتمەن کۆمۆنیستەکان دەبێت لە ریزی پێشەوەی خەباتی دژی تیرۆریزمی ئیسلامی سیاسی و تیرۆریزمی دەولەتی ئەمریکاو روسیاو سعودیە… دابن. ڕێگای ئەمە وە گرانترین ڕیگا کە لەهەمانکاتدا مومکن ترین ڕیگایە، وەستانی جەنگە بەلام وەستانی جەنگ بە واتای:(” پێویستە جەنگ بوەستێت” تەنها بەمانای وەستانی” تەقە” نیە. بەڵکو بەمانای نەمانی تەواوی کەشتی یە جەنگی و سەربازییەکانی ئەمریکاو ڕوسیا و ووڵاتانی دیکەیە لە ناوچەکە و دەریای سپی ناوەراست و تەواوی پێگەو بنکە سەربازییەکانیان. جیهانی ئەمرۆ نە پێویستی  بە بارچاوەشی ئەمریکایە وە نە بە حەیتەی ڕوسیا. هەروەها بەمانای وەستانی ناردنی ” جیهادییەکان” و وەستانی فێرکردن و پەروەردەکردنیانە، وەستانی کۆمەکی مالی و مرۆیی و،  هەواڵگری و سەربازییە بەم هیزانە، بڕینی کەناڵەکانی ڕاگەیاندیانە لە کەناڵە ئاسمانیەکانەوە بگرە تا دەگاتە فەیسبوک و تویتەرو لە هێزە تیرۆرسیتەکان و فەتواچیەکانیان. قەدەغەکردنی موتلەقی رەوانەکردنی چەکە بۆ ڕێکخراوو هیزو گروپە تیرۆر یست و میلیشیا جیاوازەکانیان. جەنگ دەبیت بە فەوری بوەستێت. هەموو دونیا تەنانەت ئەوانەش کە زۆر گوێندانە بیستنی هەوالەکان یان ئەوانەی کە ئاگری شەڕەکانیان زۆر لێدورە لە  نیوزلاندەوە بگرە تا دەگاتە ئالاسکا… لە جیهانێکی ئامن و ئارامدا گوزەران ناکەن. وەستانی جەنگ بەرژەوەندی هەموو ئەوانەش دابین دەکات چ جا بگات بە ملیارەها ئینسان کە لە ڕۆژهەلاتی ناوەراست و جیهانی عەرەب و ئەوروپاو روسیاو ئەمریکا دەژین. واتە ئەوانەی لە ناوجەرگەی جەنگ و دەوروبەرەکەیدا گوزەران دەکەن، یان وولاتەکانیان دەرگیرە لەم جەنگەدا.”)(ئەم جەنگە پیویستە بوەستێت، ئاوابونی خوێناوی” سیستەمی نوێی جیهانی” ئەمریکا!/سامان کەریم).

بەلام چؤن ئەمکارە مەیسەر دەبێت، ئیستا بزوتنەوەی دژی جەنگ لە ئەوروپا دەستی پێکردوە ئەگەرچی لاواز، دەبێت ئەمە بەهێز بکرێت و لەو نوسینەدا لەسەر ئەم لایەنە باسکراوە بەلام باسی سەرەکی کە لەو نوسینەدا، وەک تەکتیکی مارکسستی ئاماژەم پیکردوە بۆ شۆرشی کریکاری یە. ئەوە مانای چی یە؟ مانای گرتنی دەسەڵات و خەباتی بێ وچانی کۆمۆنیستی و ئامادەکردنی دەست وبردی چینی کریکارە لە باری فکری وسیاسی ورێکخراەی و سەربازییەوە بۆ شۆڕشی کرێکاری و بەم پێیە وەستانەوە، روبەڕووی  چینی بورژوایی دەسەلاتی لۆکەل جا ووڵاتە یان ناوچەیە یان تەنانەت شارێکە. گرتنە دەستی دەسەلاتی سیاسی ڕیگا کردنەوەیە بۆ رێکخراوکردنی دەیان هەزارو بگرە سەدان هەزارکەسی لەماوەیەیکی هیجگار کوردتدا، هیزێکی ڕیکخراوو هوشیاری کۆمۆنیستی خاوەن دەسەڵآت و بەهرەمەند لە پشتیوانی کاڕیکاری و هاوسۆزی ئینسانی لە ئاستی جیهانیدا، داعش لە بەرانبەریدا هەر دەبیت چۆک دابدات…. سیاسەتی سەرەکی لە لۆکەلدا وە وەک بەشیک یان تەواوکەری سیاسەتێکی کۆمۆنیستی لە ئاستی جیهانیدا تەنها دەتوانیت دەستبردن بێت بۆ دەسەڵاتی سیاسی. بەبی ئەمکارە،  بەجێهێشتنی کۆمەڵگایە بۆ تەراتێنی تیرۆریستە دەولەتی و ئیسلامی یەکان، وە وەستانی شەر تەنها لەم ڕیگایەوە مومکنە. تەنانەت ئەگەر بزوتنەوەی دژی جەنگ لە جیهاندا زۆر گەورەو مەزن بێت بەبی دەست بردن  بۆ دەسەڵاتی سیاسی لە لۆکەلەکاندا، ناتوانیت کاریگەری گەورەی هەبێت. نمونەی وەستانەوەی گەورەی دژی جەنگی ئەمریکا بۆ سەرعێراق لە ساڵێ ٢٠٠٣دا لە یادی هەمووماندا ماوە. وەستانەوە دژی هەردوو جۆری تیرۆریزم داعشی و ئیسلامی سیاسی و تیرۆریزمی دەوڵەتی ئەمریکاو هاوپەیمانەکانی و روسیاو هاوپەیمانەکانی،  لە بزوتنەوەیەکی فراوانی لۆکەڵی و ناوچەیی و جیهانیدا، لەڕیگای خەباتێکی ئەتنەرناسیونالستی کرێکارییەوە  مەیسەر دەبیت کە لۆکەڵ و لە ئاستی ناوچەکەو جیهانیدا دەنگ وە کاریگەری هەبیت وەکو هێزیکی سیاسی. لەو پەری نائامادەیی کۆمۆنیستەکاندا، لەو پەڕی دابەشبونی چینی کرێکاردا بەسەر قەوم و تائفەو عەشیرەت و ئەوروپاو ئاسیا و  ئەفەریقاو ڕەش و سپی دا ، کارێکی هێجگار سەخت و دژوارە بەڵام مومکنە. مومکنە چونکە هەر ئەمەیە کاری ئێمە کاری  ترمان نیە. کۆسپی ئەم بزوتنەوەیە ئەوەیە کە دەست نابات بۆ پایەکانی کاری کۆمۆنیستی و لە ڕوداوەکاندا بە پەلە وتاریک دەنوسێت و پێی وایە کە کاری کۆمۆنیستی ” کەمپینە”، ئەمجۆرە کارانە بە هیچ ناگات، هەروەک چۆن بە هیچ نەگەیشتوە.

 ئەمریکا وهاوپەیمانەکانی بەکریگیراوی کەسن نین، تەنها سەرمایەی گەورەی دونیا نەبیت،  چ جا بگات بەوە کە بەکرێگیراوی کۆمۆنیسەکان بن. ئەمریکا هاتوە لەپیناو یەکلایکردنەوەی دەسەلات لە ئاستی دونیادا شەر دەکات، دەیەوێت بەموسڵ تەرازوی هێز لە سوریادا بالانس بداتەوە، بەهەرحال لەمبارەوە قسە زۆرە لە وتارەکەی فاتیحشدا بەشێکی هاتوە، کە ئەمریکا ئامانجی چیە.  بە جیا لە وەی شیوازو تەفسیرەکەی چۆنە، بەڵام کەوایە ئیتر لێدان لە داعش نیە بەڵکو بەدیهێنانی ئامانجەکانی خۆیەتی و داعش وەک  ئەنجامێکی شەرەکە دەبیت لە موسڵ نەمێنێت. بەلام داعشی چەکدار نامێنیت، ئەگەر نا هەر سبەینی ئەو داعشە چەکدارانە دەبنە حەشدی وەتەنی نوجەیفی، یان داعشی مەدەنی و تەنانەت پۆلیسی نێوخۆی موسڵ،  بەم ئالوگۆڕە، فەرهەنگ و داب و نەریتیان ناگۆرێت، لەوانەیە جلو بەرگیان بگۆریت و ڕیشیان بتاشن، لەمەودوا موچەکەیان لە عبادی و نوجەیفی وەرگرن.

فاتیح دەڵیت “مەوزوعیەتی نیە کە خەلکی موسل و کۆمۆنیست و ئازادیخوازەکان بیانەوێت دژایەتی بکەن”ئەگەر دژایەتی نەکەن، ئەوەی لەباری عەمەلیەوە بۆ مندالیکیش ڕۆشنە ئەوەیە کە ئەمریکا باڵا دەست تر دەبیت لە عیراق و ناوچەکەدا، ئەمە فاتیح خۆشی ئاماژەی پێکردوە. باڵا دەستی ئەمریکا بەمانای فەراهەمکردنی زەمینەو پایە بابەتیەکان بۆ دامەزراندنی دەوڵەتێکی سوننی مەزهەب، ئەگەرچی ئەم سیاسەتە دوای روخانی مێرسی و ئیخوانیەکان لە میسر شکستی خواردوە، بەلام ئەمریکا دوبارە تێهەلچؤتەوە وەک پەلامارو پەڵەقاژەکانی کۆتایی. تێگەیشتن لەم سیاسەت وکارە بیرکردنەوەی زۆری ناوێت تەنها سەرنجیکی ورد لە سیاسەتەکانی ئەمریکا لە سوریاو ئەلیبۆ بەرۆشنی ئەوە دەردەکەوێت کەئەمریکا سیاسەتیکی ئاوەهای هەیە لە ژیر ناوی ” ئیسلامی یان ئۆپۆزسیۆنی موعتەدل” دا، ئەوەنیە دەستی روسیای گرتوە و تا پێی بکریت ناهێلیت لەو تیرۆرستانە بدات کە خەڵکی حەلبیان ئەسیر کردوە…. ئەوە نیە خەڵکی رەقەی بەبارمتە گرتوە ناهێلێت سوپای سوریا هیرش بکات … ئەوە نیە بە ئاشکرا قەزافیان ڕوخاند لە ژێر ناوی “شۆڕش ” لە لیبیادا. وە چەکو پارەیان نارد بۆ تیرۆریستەکان و بە کەشتی ڕەوانەیان دەکردن، مەگەر مەدام کلینتۆن هەموی ئاشکرا نەکرد. ئەوە بۆتە تیورێکی واقعی تا ئەمریکا لە تیرۆریستەکان بدات پان دەبنەوە دوبارە خۆیان ڕیکدەخەنەوەو بلاودەبنەوە، بەلام ڕەنگ و ناوی خۆیان دەگؤرن. ئەمە ئەگەر واز لە بەکارهێننای چەکی ئەتۆمی و شەری ڤێتنام و بەکارهێنانی‌ چەکی یۆرانیۆم و ئابلوقەی ئابوری لەسەر عیراق بهێنین ، یان ئەگەر واز لە ” شۆرشی ناتۆ” بهێنین لە لیبیا… ئەوە ئەمریکایە وفاتیح  هەموو ئەو لایەنانەی کە لەم چوارچێوەیەدا بیر دەکەنەوە، زۆر باش ئەمە دەزانن، دەزانن خەتەری سەرکەوتنی ئەمریکا هێجگار مەترسیدارە، ئەمە بەجیا لەوەی، داعش کە بەقەولی خۆی” ئەمریکا دروستی کردوە” بەڵیدان و دیار نەمانی دەچیتەوە سوڕئ سڕ بونی خۆی بۆ ماوەیەک دیار نامێنیت، پاشان و لەم هەلومەرجەدا لە ژێر ناویکی دیکەدا سەرهەڵدەداتەوە.

فاتیح و هاوبیرەکانی بە شێوەیەکی ناڕاستەوخۆ چەپلە بۆ پەلاماری ئەمریکا لێدەدەن” مەوزوعیەتی نیە کە کۆمۆنیست و…” ، وە بەئاشکرا لەگەڵ جەنگ و شەرێکی مالوێران و کاولکاریتر و تیرۆریزمی دەوڵەتیدان، لە هەمانکاتدا ئەم بوچونە دەبێتە شەریکە بەشی میدیای ڕاستی ئەمرؤی دونیا لە برەوپێدان بە خۆشباوەری و وەهمێک  بەوەی کە: ” دەستیان ناگرین” ” مەوزوعیەتی نیە موخالەفەتیان بکەین” ….. گوایا ئەمریکا دەجەنگی و هاتوەو  داعش  وتیرۆریستەکانی دیکەیان بۆ تەفروتونابکات. نەک هەر ئەوە لەوە خراپتر ئەوەیە، کە کۆمەلێک مەوعیزەی ئەخلاقی دەدەنە فرۆکەوانەکان و رۆکێت تەقێنەکان کە دەبێت بە ئەخلاق بن، نابێت رۆکێتەکانیان مندالان و خەلکی مەدەنی بکوژێت!! نابێت دەنگی فرۆکەکانیان بەرز بێت نەوەکا مندالەکان خەبەریان بێتەوە!! نابیت قوتابخانەو خەستەخانەکان و ژێر خانی ئابوری بەتایبەت کارەباو ئاوو بۆردومان بکریت!! بەهەرحال  دواتریش واتە دوای ئەوەی کە داعش لەوشوێنانە نەما، کۆمۆنیستەکانی مەڕ خۆمان و ئازادیخوازان هێواش هێواش بە سرودی ئەنتەرناشیونالەوە خۆیان دەکەن بە موسل و ئەلیبۆو میسراتەو بەنگازی دا. باسی من ئەوەنیە کە دەقاو دەق ئەو قسانە کراوە، بەڵکو واقعیەتی هەلوێستی فاتیح و ئەم مێسۆدە لە بیر کردنەوە ” داعشی لێ یە دژی هیچ جەنگێک نیم کە دژی دەرپەراندنی داعش بێت، مەوزوعیەتی نیە کە دژی جەنگ بیت” ماناکەی ئەوەیە کە باسکرا!!. جیاکردنەوەی ئەمریکا لە کردەوەکانی وەک جیاکردنەوەی خانەیەکی لەش وایە لە جینەکانی. ئەم جۆرە تیڕوانینە لە پاشماوەکانی تەبلیغاتی قۆناغی جەنگی ساردەو هیومانتاریزمێکی پاسیفە. لەوپەری خۆیدا خێمەی ئاواراکان زیاتر دەکات. حەتمەن ئەگەر جەنگەکە بوو کە بوە بە دەر لە خواستی ئێمە وە بەدەر لە تەئید کردنی ئێمە وە بەدەر لە چەپلە لیدانی ئێمە، وە بە ئیدانەکردنی ئێمەوەو خەباتکردن بۆ وەستانی،  ئەوکات حەتمەن ڕەخنە گرتن لە کاولکاری و کۆمەلکوژی  مەوزوعیەتی دەبیت وە کوێگری دەبێت. حەتمەن ئێمە دەبیت ڕۆڵی سەرەکیمان هەبیت.

ئەمریکا بەکڕێگیراوی کەس نیە و یەک بست زەوی ناداتە هیچ لایەنو هێزێک لەوانە خەلکی موسلیش، مەگەر بەرژەوەندی خۆی هەبیت. هەلومەرجی ڕاگوزەری مێژوویی  ئەمرۆی دونیا خەباتکردنی واقعی وڕابەریکردن و پێچانەوەو بنەبڕکردنی تیرۆریزمی ئیسلامی و دەوڵەتی تەسلیمی چینی کرێکارو کۆمۆنیستەکان کردوە، پێمان دەکڕیت یان نا؟! هەموو باسەکە ئەوەیە. لەم هەلومەرجەدا، ڕیگای دیکە نیە مەگەر ئەوەی بورژوایی خۆی بە جەنگ ئەم دەورانە تێپەڕینێت، ئەوەش بەربەریەت لە چاویدا ئەوروپایە.

شەڕی داعش و مەنفەعەت تەڵەبی دژی رژیمی !

ڕوانگەو مێسۆدی دژی ڕژێمی ‘فاتیح” لەم نوسینەی دا شەپۆل دەدات، باسەرنج بدەین. فاتیح دەنوسیت: (هەروەها لەڕوانگەی منەوە، دەسەڵاتی وەحشیگەری جمهوری ئیسلامی لە ئیران، لە ماوەی چوار دەیەی ڕابوردودا، هەمیشە هۆکاری سەرەکی فراونبونەوی تیرۆریزمی ئیسلامی  بوە لە ناوچەکەو جیهاندا. بەم پێ یە ولە بەرئەوەی کە ئەم رژێمە  مەیداندارە، تیرۆریزمی ئیسلامی داعشەکان، تالیبانەکان، قاعیدەییەکان، بۆکۆحەرامەکان، نمونەی ئەوانە ، کۆتای نایەت. وەحشیگەری ئیسلامی،  جمهوری ئیسلامی، هیچی کەمتر نیە لە داعش.)( هەمان چاوپێکەوتن – تەئیکد هی منە).

لە باس و وتارێکدا فاتیح جمهوری ئیسلامی ئێران و داعش دەکاتە یەک ، کە جەنگێکی گەورەی ناوچەیی لە ژیر ناونیشانی جەنگ دژی ‘داعش” لە ئارادایە. لەکاتێکدا فاتیح وا دەنوسێت کە سعودیەی عەرەبی وبەحرین بە پشتیوانی حزبە ناسیونالستەکانی وەکو حزبی دیموکراتی ئێران و ئەوانی دیکە، خەریکی نانەوەی ئاشوبیکی خەتەرناکن لە کوردوستانی ئیران و هەروەها بەرەی عەرەبی ئەهواز، لە کاتێکدا دەنوسیت کە باسی خۆکۆکردنەوی ئۆپۆزیسونی ئیران و نەتەوەپەرستەکانی کوردە لەوێ لە ژیر ناونێسانی بەرەی جۆراوجۆردا، لە کاتیکدا ئەمە دەنوسیت کە ئەمریکا لە هەوڵی گەورەدایە بۆ نانەوەی ئاشوبیکی گەورە لە ئیراندا بە هاوکاری سعودیەو ئیسرائیل و تورکیا. بە هەرحال من نازانم فاتیح بە چ نیەتیک ئەم لێکچونەی لەم وتارەدا داناوە، بەلام سیاسەت پەیوەندی بە نیەتەوە نیە. ئەو باسە ئەو ” وەحشیگەری ئیسلامی جمهوری ئیسلامی هیچی کەمتر نیە لە داعش” من دەلێم  وەحشیگەریەکەی زیاترەو کوشت و کوشتارەکەی زیاترە وا چل سالە دەسەلاتدارە. کەواتە باسی من ئەوە نیە کە جمهوری ئیسلامی ئێران کەمتری کردوە لە داعش.

باسەکە ئەوەیە لە هەلومەرجیکی وادا هێنانەوەی لێکچونی لەم چەشنە ، پڕوپاگەندەیە بۆ لێدان لەم ” داعشە ئیرانیە”،  بانگەوازو بەئاگاهێنانەوەی ” خۆیان زۆر بەئاگاترن” ئەمریکاو ئەوانی دیکەیە بۆ لێدان لەم ” داعشە ئیرانیە”، بەکورتی بلێم و بەجیا لە هەر نیەتێک کە فاتیح هەبیت، دەچێتە خانەی بانگەوازو پڕوپاگەندەی جەنگەوە دژ بە ئیران و بەڕابەری ئەمریکا. ئەمە خەتەرناکە، میسودو ڕوانگەیەکی دژی رژیمی یە کە لە هەلومەرجی ئیستادا، چەند بار خەتەرناکترە. لە کاتی رودانی کارەساتیکی وا لە ئێراندا، ناوچەکە دەباتە ئاستیک لە فەوازو پشیوییەوە کە چارەسەرکردنی هێجگار زەحمەت دەبیت و کۆمۆنیستەکان و کاری هەر حزبێکی واقعەن کۆمۆنیستی چەند بار سەختتر و دژوارتر دەکات. ئەم ڕوانگەیە دەبیت لە نیو کۆمۆنیستەکاندا وەدەر بنرێت، ڕوانگەی ” جنگەدانی ئەمریکا بۆ لێدان لە ئەمریکا” ئەگەر چی ئەمریکا نە نیازی وای هەیە وە نە پێم وایە لە سیاسەتی دا هەبیت کە لەئیران بدات، بەلام ڕوانگەیەکی وا بازاری هەیە چونکە لە ئیرانێش هەم ئەحمەد چەلەبی هەیە وەهەم بارزانی هەموویان هەن. بەلام ئەم ڕوانگەیە ئەگەر نەتوانیت ئەمریکا بخاتەوە نێو شەریکی راستەوخۆوە ئەوا دەتوانیت کۆمەک بکات بە نانەوەی ئاشوبیکی گەورە لە ژیر ناوی ” شۆڕشدا” هەرئیستا عەبدوللای موهەتدی و موجاهیدەکان و حەمیدیەکان ئامادەیی کاریکی وایان هەیە. کۆمۆنیستەکان ئەرکیانە بە توندی وە بەبی دودڵی ئەم ڕوانگەیە بە ڕەخنەی مارکسستی لە بناغەوە دەرکێشن.  تەواوبوو

٣٠ئۆکتۆبەر٢٠١۶